Mar 10 | ASO | STEP | Izesu' aza a'mine ebe' hulo Zudaia misubo nene vo hulo Zodani noso helala vine'. Vo nela neivo ezela evene' muki' ihe' igi di gese' ikevo aza oga' ine' ne'mino gohi mono' apize ngemo minine'.

Mark 10

Izesu' Vene' Huli-ngidaa' Nemu' Lo-ngimine' Gamazi

(Mataio' 19:1-12; Luka' 16:18)

1 Izesu' aza a'mine ebe' hulo Zudaia misubo nene vo hulo Zodani noso helala vine'. Vo nela neivo ezela evene' muki' ihe' igi di gese' ikevo aza oga' ine' ne'mino gohi mono' apize ngemo minine'.

2 Ne'mino neivo Halisaio' mono' laa' ave malite igi emengu' mili ti' li longo' i-dani': Ve mali'mo elenahine imisele huliline' nene gaza gelanivo leze Zuda veti lou' gamazi avuto' ilihe amilive. 3 Longo' i-dikevo velepe' izo longo' o-ngedo ti' lo line': Mose' aza nadive lo lo huko-lengede neine' neve. 4 Ne'mine lavo ingine ti' li lani': Ve ma elenahine imiselelove lo gelo ma vene' vemoho' izi hukaa' luhuvo gizo emosa imiseleleseive lo Mose' aza gele leme neine' ve. 5 Likevo aza ti' lo line': Lingine gamazi gilami peleseve' izaa' angumu' a'mine lou' gamazi nene gize-lingidine' ma neive. 6 Gize-lingidine'za O'moso'mo inite' mata' gana' api' ogo do soto' ine' gamenela nene vene' vemoho' do soto' ine' ve. 7 Nemu' ti' lo lo neine' ma neive:

Vemoho' nene izelehingi melehingi hulo
elenahida bizo minavo ingine hamo' lili' asine' gelavo minilisasive.
8 Nemu' nene ingine sita' nizasive ma lo-ngedamolosune. Mo hamo' nene nizasive. 9 Nemu' nene O'moso'mo inite' do hamo' ogo molo neinguti' ve malike do ize' molaa' nene nomive. 10 Ne'mine lavosa numungu' dizi minangu' nene izipahala zuho nete a'mine initekumu' nene gohi longo' i-dani'. 11 Longo' i-dikevo ti' lo lo-ngimine': Ve mali'mo elenahine imisele hulo vene' gohi ma daline' nene aza elenahine do gopo o-do O'moso'mi lou' gamazi avuto' oloseinako lihime naba daloseive. 12 Ido' vene' ma vanahine hulo-do ve gohi malo' viline' nene O'moso'mi lou' gamazi avuto' oloseinako lihime naba daloseive.

Izesu' Izipe nGomo No'noho' Ize-ngidine' Gamazi

(Mataio' 19:13-15; Luka' 18:15-17)

13 Evene' malite izipe ngomo nene oko'nido' do gelo no'noho' ize-ngedelive li Izesuda ngele'mizi nivavo izipahala zuho nete o've li-ngidi ngelemani'. 14 Ne'mine ikevo ningo gelo Izesu' aza izebolo' molavo ti' lo lo-ngidine': Izipe ngomo ngomo me'mine minave nene O'moso'mo gizebo o neingu' ngele'mize molaa' neinako huli-ngimikavo nenita ha alizaze. O've li-ngidamilo. 15 Naza lamineto' nolo-lingimuve: Izipe ngomoliti ngemeni dameni ne'minesi mini O'moso nene gizebo vete minelive li gelekele' lapa nomine' i-damilizave nene ei' O'moso'mo gizebo o neingu' nene mo keke' vi hilamilisave. 16 Ne'mine lo izipe ngabuti' izo ana oko'nido' nohito no'noho' ize-ngidine'.

Izesu' Heneni Vemu' Line' Gamazi

(Mataio' 19:16-30; Luka' 18:18-30)

17 Izesu' aza aka volosa api' neivo ve mali'mo loti' izo ogo hetelo gizeneu' gubi' ize emo longo' o-do ti' lo line': Tisa' lamino, naza nene nadi' okuvo O'moso'mo minevo' minevo' nemeni dameni nemelive. 18 Lavo Izesu' ti' lo lo-imine': Nezemu' nene ve lamino nanimu' nolo-nedane. Lamine' minave nene hamokisi mo nizamavo O'moso ei' hamo' nene lamine' minive nenako ne'mine laine' nene neni' monovo'ne nadi' o neive. 19 Gaza aka gamazi nene mo gele nane. A'mine gamazi nene ti' lo neive: Lingine evene' ngibili hilamilo. Ido' vene' vemoho' lili' ikeni' nete lingine bizivo' mini vene' nehe vemoho' nehe gohi masi gopo ingamilo. Ido' gumine amilo. Ido' evene' mamu' gopo' napa gamazi li-ngidii sakupo gamazi li-ngidamilo. Ve maliti inite' nene tiliki igi damilo. Ido' izetingine metinginemu' gilikevo dizavo gelekele' i-ngidi minilo. 20 Ne'mine lo-emavo ve aza ti' lo lo-imine': Tisazo. A'mine laine' muki' nene naza izipeloti' gelo e'mete'mo ogo minuvoni' ve. 21 Lavo Izesu' aza ningo ninge lamine' o-do ti' lo lo-imine': Gaza inite' hamo' ma amanidi'mo nene lisihe' amane. Vo inite' mataka muki' nene ize' molo meni do a'midoti' moni nene do goho' gahali' ize' molo ngemezo. Ne'mine iline' ne'mo nene henenika Okulumokuko nene ma mineleseive Ne'mine ogosa ogo ne'metezo. 22 Ne'mine lo lavo ve aza ei' heneni've vai' lo minine' nemu' agae lo geni belavo muhele' ogo vo ha ha ine' ve.

23 Novivo Izesu' aza velepe' izo vonu' ngebelo hulo eza ema ogo izipahala zuho ti' lo lo-ngimine': Heneni nganeni ve ingine O'moso'mo gizebo o neingu' nene vi hilalisa ge'nebe goloso ilisave. 24 Lavo izipahala zuho ingine Izesu' gamazi ne'mine lingumu' gopo ga'ine gilani'za gohi ti' lo lo-ngimine': Vekizo. O'moso'mo gizebo o neingu' vo holaa' nene ge'nebe gono goloso neive. 25 Ido' kamela ize nene naba neine' nenako nemu' nene nala' loloso' iga' nani' nakese ne'mi veleu' nene ma volosa iline' nene ge'nebe goloso oloseine'za heneni ve nete a'mine nene ivile' ivosa O'moso'mo gizebo o neine' ebeku' nene vilisa ge'nebe ilisave. 26 Ne'mine lavo ingine upuho' goloso igi vo'ine vavo angise'ine ti' li li volelo' melo' ani': Laza nene O'moso'mo umo hilive nene heneni ve lolo' o-ngedaa' neihe lo gilune'za gaza heneni ve netesi O'moso'mo gizebo o neine' ebeku' nene mo vi hilamilisave lo lainako nemu' nene O'moso'mo evene' hamokisi mo ma do lu' izamivo eze gizebo ingu' nene vo holamolobe lo nogilune. 27 Ne'mine likevo Izesu' aza vonu' nongebelo ti' lo lo-ngimine': Evene' angise'nidati' lukuvo ngeli ma namilisaha O'moso nene engi' ne'mine nomive. O'ove. Ei' nene inite' muki' oga' amuzo do neine' nenako evene' do ngu' izelido' lisihe' o neive.

28 Lavo Petolo' api' ogo ti' lo lo-imine': Gaza gelezo. Laza neve inite' matate muki' nene hulo osu' lo ge'meto noune. 29 Lavo Izesu' ti' lo line': Lamineto' ma lo-lengemelove. Ve ma ingine nenikumu' ido' mono' gamazi laminekumu' numuno ebe'ine nehe uvo'ningine naku'ningine nehe ate'ningine aluno'ningine nehe ize'ningine me'ningine nehe ido' izipaha'ine nehe misubo'ine nehe ne'mine inite' ma huli nilizani' nene 30 a'mine huli nilizani' initeto' nene medeli ma damilizavoba mo dalizavevo' nene nizave. A'mine huli nilizani' inite' muki' hamoto' hamoto' nene hadeti hadeti ne'mine gohi ma dika' dika' ilisave. A'mine numu'nido' nehe engi' zuholo' nehe minamuno'nido' nehe a'mido' a'mido' nene gohi gohi dalisave. A'mine inite' nene idise none' gameneu' nene dika' dika' ilisani'za goboni mala' mala' ne'mi lulou' nesi mini-di vilisave. Ido' alinge' gamene ma soto' ogo alingu' nene minevo' minevo' ngemeni dameni nesi dalisave. 31 Ne'mine ilisani'za dizi nilizani' aleveuti' linge muki' nene limi minilisave. Ido' limi nilizani' aleve nene dizi minilisave.

Izesu' Helo Galeseuti' Oteline' Gamazi Nene Gohi Lo-ngimivo Gamene Setohamo Ine'

(Mataio' 20:17-19; Luka' 18:31-34)

32 Zelusalemi numuda vilisa akalo' nivavo Izesu' aza gomu' molo novivo izipahala zuho ingine nene ngehelele ize mine' mine' ivo nivavo ma nge'meti vave ingine nene golise gilani'. Ti' navo Izesu' aza izipahala zuho tuvelu nene ngele'mize gaheve ogo ezela soto' o-deline' initekumu' nene gohi api' ogo ti' lo lo-ngimine': 33 Gililo. Laza nene Zelusalemi numuno ebeta dizo novune. A'mida nene O'mosolati' ve gihile neni' nene eveneto' medeli mini O'moso inite' lehizi-daa' ave nabasi avotemote lani' mono' apizi ngimaa' avesi engi' a'ningu' milikevo ingine goni' i-nidi lihimeka apaso helelinido' o neive li Zuda ve minamani' heta ato' aleveliti a'ningu' mili-nidikevo 34 ingine gize zohi' i-nidi gituho' i-nidi gasavasi nalatunu' nene mehe'ne izivi' ledivi' igi nibili nibili hililisave. Ne'mine igi nibili hilikevo gamene setohamo vavo gohi otelesuve lo line'.

Zakoboki Zohaneki Evene' Naba Guvetesi Ve Lolo' Olosive Li Izesu'ni Longo' I-dasine'

(Mataio' 20:20-28)

35 Zebedaio' gipele seta' Zakoboki Zohaneki ingi Izesuda vi ti' li li-imasine': Tisazo. Laza inite' nanitekumu' lolosihe a'minemu' lokusivo gaza a'mido' o-ledeline losa nolusive. 36 Likesivo aza ti' lo longo' o-ngidine': Lingi nene naza nadi' o-lengedelongumu' nilasive. 37 Lavo ti' li li-imasine': Gaza Guvekasi ve lolo' ogo mineline' gamenela nene laza gezeloti' lemo evene' lingesi ma ngivile' ogo guvetesi ve lolo' ogo mino anga zamelasi adavalasi minilizo lo gele lemeline losa nolusive. 38 Likesivo aza ti' lo lo-ngimine': Lingine longo' i-nidasine' initeli'mi monovo nene gilami gopo likesive. Inite' goloso i-nidilizani' nene ekese' noso ne'mino nenako a'mine i-nidilizani' inite' nene ha gehelesa nouve. Ido' linginesi neni' geheloni' inite' ekese' noso ne'mine minine' nene ha gihilisido' i nizasihe. Mulumo alumo nite' noso ne'mino holosa ne'mi lulou' minelongu' nene linginesi ne'mi lulou' nene ha minilisido' i nizasihe. 39 Lavo ingine ti' li li-imasine': Ee, laza ne'mine ha olosido' o nosive. Likesivo Izesu' aza ti' lo lo-ngimine': Lamine' lingine neni' geheloni' geni nene gihi mulumo alumoli'mi lulou' minelongu' nene linginesi a'mine'mi lulou' nene minilisine'za 40 a'ne zamelasi adavalasi minaa' mo'mosi' nene neni' inite' neivosa lengemelohe. O'moso'mo dalisive lo do va'va' o-ngidive engikovo' nene dalisasive.

41 Zakoboki Zohaneki ne'mine asine' nemu' izipahala zuho linge teni ingine gilii engikumu' nene mulu'ningu' goloso ine' 42 Ne'mine ogavo Izesu' asi lo-ngedavo ezela ikevo ti' lo lo-ngimine': O'moso'mi zuho minamani' heta ato' ve engi' gizebo ve'ine ve lave ingine nete evene'ine nene gelekele' i-lidilizave li amuzo mili li-ngidaa' nave. A'mine evene' engita evene' naba minave nete nene a'mine evene'ine zuho nene ngivile' igi amuzo ve goloso minisa gizebo i-ngidaa' nave. Ne'mine iga' nani' nemu' nene lingine mo gili nizani'za 43 lengi' muliseu' nene ingine iga' nani' ne'mine nene ma amilisave. Lengikuti' ve mali'mo guve'nesi ve lolo' olove lo gelo ma aza nene lengi' gelekele' vetine ne'mine lolo' ogo mineleseive. 44 Ee, ve ma aza gomu' molo lengemo evene' naba minelove lo gelo ma aza nene mukiliti goboni izipe ne'mine lolo' ogo mineleseive. 45 Ido' ne'mine noluvoni' nene naza O'mosolati' ve gihile nouvoni' nesi nene evene' gelekele' i-nidi nele'mize lamine' ilizave losa lemamuve. Asi gelekele' o-ngedo ngele'mize lamine' olosa ogo evene' muki' nene meni hizo do ngu' izo do tine' molo-ngedelove lo engikumu' oko'ne hulo helelesa limuvoni' nenako nemu' noluve.

Izesu' Aza Vele Likive Batimaio'ni Do Lamine' O-dine' Gamazi

(Mataio' 20:29-34; Luka' 18:35-43)

46 Zeliko numuda vi hetelani'. Vi heteli A'mine ebe' nene huli izipahala zuhosi evene' muki' ezela di gese' igi minavesi nivavo Timaio' gipele Batimaio' aza vele likavo mino monimu' voku' voku' lo aka gahevela minine'. 47 Mino Nasalete ve Izesu' nave likevo gelo api' ogo amuzo molo asi lo line': Izesuvo, guvelesi ve naba Davidi' a'vo ezelo' medelo minanive make, nenikumu' nene mulumo'ne ningevo. 48 Lavo evene' muki' ingine legeno minelive li o've li-di elemani'za aza nene gohi amuzo molo vise naba lo ti' lo line': Davidi' a'vo make, nenikumu' nene mulumo'ne ningevo. 49 Ne'mine lo'mo lo'mo angumu' nene gelo Izesu' aza akalo' vo ote mino alize li-imilo line'. Lavo vele likivemu' nene asi ti' li li-imani': Gezemu' nolize. Mulungau' lamine' gelo oto ano. 50 Ne'mine likevo vele likive gelo saketi've apase hulo upuho' ogo oto Izesuda vine'. 51 Vogavo Izesu' aza ti' lo longo' o-do line': Gaza nene nadi' o-gedelove losa nogelane. Ne'mine lo longo' o-davo aza ti' lo line': Guve'nesi ve make, gaza ve'ne nene do lamine' oganivo gohi ve'ne ningeloho. 52 Ne'mine lavo Izesu' aza ti' lo lo-imine': Gaza gele ele'vole' anidi'mo nene lamine' ogange. Vozo. Ne'mine nolivo a'mido' lite' lo vele nene lamine' ogavo vele ningo akalo' nene Izesu'ni e'meto vine'.